曼城漁人得利

猪拉多纳

「後蘇神時代」紅軍有排執

在紐約洋基球場舉行的國際冠軍盃B組上演次輪大戰曼城對利物浦；「紅軍」今夏學咗上季嘅熱刺咁，用賣走蘇亞雷斯嘅錢買入五名新兵，相反曼城同以前相比，今夏喺轉會市場冇乜大動作，買入嘅都唔係大牌球員，真係轉死性！不過上季嘅熱刺已經話咗畀我哋知，多買人都唔係一件好事，新舊球員默契不足、磨合需時，表現自然飄忽不穩，再加上近幾場熱身賽睇到一班紅軍球員仲未上力，狀態同近兩場大勝嘅「藍月亮」比差好遠，今場科娜捧曼城贏波！

（有線61及201台周四早上7時直播）
5新兵來投未夾熟

利物浦正式踏入「後蘇亞雷斯」時代，用賣走「蘇神」嗰筆錢買入列基林拔、安利簡恩、拿沙馬高域、拉爾拉拿同洛夫雲五大新將，如果唔係昆士柏流浪射手雷米體測肥佬退貨，佢將會係紅軍第六名新兵，情況簡直係同熱刺去年夏天用加里夫巴利一個換入七名新兵一模一樣。

呢五大新兵入面，前三位球員都已經為紅軍上陣，但實際對球隊起到乜嘢作用就仲未見得到：中鋒列基林拔，買佢入嚟應該係為咗當球隊久攻不下嘅時候，派佢後備上陣撞散敵方後防。安利簡恩作用同佐敦軒達臣相似，都係跑動型中場，守強於攻；而上場對奧林比亞高斯處子登場嘅拿沙馬高域，速度雖然快，但射術仍有待改善。

科娜並唔係預知得到呢批新人嚟咗紅軍會踢到好似上季嘅熱刺咁，但佢哋需要時間融入球隊，同舊有班底建立默契，冇可能踢一兩場熱身賽就可以完全踢番喺舊有球會嘅水準，所以今場對曼城真係唔易踢。
藍月亮副選質素高

反觀曼城近兩場對肯薩斯體育會同AC米蘭雖然只係派副選上陣，但已經夠大炒對手，原因除咗係呢班副選質素仍然好高之外，最主要係佢哋上季都夾慣咗，再加上上季坐多過踢嘅黑山前鋒祖維迪近期大爆發，防守一向唔穩健嘅紅軍今場有難，曼城W值得捧場。