皇蘇啞火難烤鴨

猪拉多纳

賣走基沙文自斷一臂

周中歐洲賽多籮籮，今晚又有歐霸外圍賽第三圈首回合，其中西甲皇家蘇斯達先喺主場迎戰蘇超鴨巴甸。呢場看似強弱懸殊，點秤皇蘇都贏成條街喇，不過佢哋啱啱賣走弗爆新星基沙文，一時間未搵到合適替身，撞正愈戰愈勇嘅鴨巴甸絕對唔易食，不妨冷敲鴨軍讓球客勝。

（周五凌晨2時30分開賽）

皇蘇上屆仲踢緊歐聯，今屆轉戰歐霸理應游刃有餘。不過話分兩頭，皇蘇剛以3,000萬歐元將法國新星基沙文賣畀馬體會，雖然賺咗一筆，但該隊以往極為倚賴呢位速度奇高嘅翼鋒策動反擊，基沙文上季單喺聯賽就攻入16球，與卡路士韋拿並列球隊神射手，依家無疑自斷一臂，從早前三場熱身賽僅入三球，就凸顯火力不足嘅問題。皇蘇失去基沙文之餘，連門神哥迪奧巴禾亦轉投巴塞隆拿，寧願去做後備都唔留隊，對皇蘇攻守打擊極大。
鴨巴甸今季客戰醒神

蘇超水平確實愈嚟愈曳，除咗喺國內打橫行嘅些路迪外，近年甚少蘇超球隊能喺歐洲賽有佳作，通常未到分組賽就行人止步，作客就腳軟係佢哋嘅致命傷。不過鴨巴甸今屆演出令人驚喜，唔單止喺歐霸連過兩關，上圈次回合眾志成城下作客贏荷甲格羅寧根晉級，連續兩圈喺客場都贏波，箭頭阿當朗尼更士哥停不了，況且佢哋經過幾場磨練，狀態遠勝皇蘇，讓球主客和鴨軍受讓一球，仲有4.45倍咁筍咪錯過。

同時間開波嘅另一場歐霸賽事，德甲球隊緬恩斯主場出戰希臘卓普利斯，雖然前者與有料教頭杜曹不歡而散，但球隊演出冇乜受到影響，仍然貫徹杜帥進攻至上嘅思維，近三場熱身賽轟入11球，今夏從賓菲加借得潛質優厚嘅塞爾維亞中場菲臘杜歷錫，勢必搵二打六球隊卓普利斯祭旗，入球大及讓球主勝可兼投。