特倫辛 侯城鬥踢守細波

猪拉多纳

英超球會侯城今晚首次出戰歐霸盃，佢哋喺第3圈外圍賽首回合作客面對斯洛伐克球隊特倫辛，呢場波亦係領隊布魯士第100次帶隊出戰，試問點可以失威先？就算贏唔到都唔輸得，咁嘅情況下入波未必多，1.72倍入球細諗得過。

（開賽時間：周五凌晨1:00）

侯城上季喺足總盃決賽輸畀阿仙奴，但由於「兵工廠」一早攞到歐聯席位，所以佢哋以亞軍身份攞到歐霸盃入場券。今次係侯城創會110年以嚟，首次踏足歐洲賽場，唔少紛絲都充滿期待，接近600名球迷更會隨軍出征打氣，希望見證呢個歷史時刻，試問侯城班友邊想衰畀人睇？
第100次領軍 布魯士穩陣行先

今仗同時係主帥布魯士第100次為侯城領軍，相信佢都唔想打爛自己塊招牌咁失威。布魯士賽前話要殺入分組賽，但亦提醒班人就算對手唔係嚟自主流聯賽都唔可以輕敵。雖然佢哋今季買入中場辛迪加斯、湯馬士恩斯加強攻力，但默契未足難有表現，況且中堅居迪斯戴維斯受傷上陣成疑。以布帥穩陣作風，今仗打得保守啲等返主場發惡有咩咁出奇。

特倫辛喺上輪賽事首回合大炒禾獲甸拿4:0，點知佢哋喺次回合大敗0:3差啲失去出線資格。教練施維拉見過鬼都怕黑，猛提班球員做好防守先，既然雙方都唔敢輕舉妄動，入波仲點會多吖！