魯賓卡山磨利刀劏斯巴達

猪拉多纳

新一季俄超今晚開鑼，揭幕戰魯賓卡山主場迎戰莫斯科斯巴達，兩軍同樣係上季最失意球隊，故此新球季銳意改革，莫斯科斯巴達名氣大，球隊平均質素亦同樣較佳，不過季前熱身賽表現未如理想，加上陣中三大主力攻擊手都因傷缺陣，今晚作客面對準備充足嘅魯賓卡山難樂觀，平手盤捧主隊。

（周六凌晨零時開賽）

莫斯科斯巴達曾贏過九屆俄超冠軍，不過近年每況愈下，上季只得第六，失去歐戰參賽資格。球會請來喺瑞士巴素利取得成功嘅少帥哈根耶堅執教，亦由辛尼特引入重量級中場舒洛哥夫領軍，以球隊實力，今季前景在魯賓卡山之上，但季初預期要經歷一段艱難時刻，原因係哈根耶堅將球隊陣式由原來嘅「4411」改為「352」，球員喺季前熱身賽顯示仍未適應，表現同成績都差，新加盟嘅舒洛哥夫季前受重創要長抖，加上另外兩名攻擊主力，10號仔阿美尼亞箭頭摩域斯恩，同11號仔荷蘭翼鋒奧克基迪都因傷缺陣，鋒力嚴重受損。
豪買馬高利華查搏殺

此外，莫斯科斯巴達今季有可容42,000觀眾嘅奧克基迪球場做新主場，但呢個球場要九月至完工，所以斯巴達同足總協議，頭六輪聯賽都要先作客，起步預咗輸蝕。

魯賓卡山同斯巴達一樣，上季成績都遠差於預期，只以第九名過終點，令佢哋六年來第一次缺席歐洲賽，主要原因係高層混亂，不斷傳出濫用資源嘅醜聞，不過暑期佢哋決心撥亂反正。球隊同斯巴達一樣換帥，改由比耶列甸洛夫執教，季前熱身賽六戰不敗僅失兩球，顯示狀態甚佳，加上今夏俄超最貴收購，650萬歐元由阿特蘭大買入嘅馬高利華查迅速融入球隊。講狀態講準備，魯賓卡山都在斯巴達之上，平手盤睇高一線。