華倫後防穿窿賓菲加大晒

猪拉多纳

同日另一場較早開波嘅酋長盃賽事，由葡超班霸賓菲加硬撼「蝙蝠兵團」華倫西亞，華倫今夏賣走幾名主力後衞，令防線漏洞百出，隨時以攻代守，賓菲加亦希望贏波一洗近期頹風，況且每入1球就計多1分有利開大，捧大盤更佳。

(TVB 301周日晚9時直播)

雖然華倫西亞有新加坡富商林榮福入主，但佢唔似得阿布、文梳亞等土豪咁燒錢無極限，除咗出錢還清債務及起新球場外，佢反而想讓「蝙蝠兵團」重上健康嘅營運模式，其中以2000萬歐元將守將馬菲奧賣畀巴塞，打破咗06年33歲意國名將簡拿華路紀錄，成為史上最貴「3張嘢後衞」算係一大壯舉，並且與高薪中堅兼隊長列卡度哥斯達解約，盡力減省開支，但連同辛德路斯及上季被外借嘅阿爾拉米相繼離隊，一下子後防冇晒人孭飛，只補入奧達文迪及回收喺利物浦冇料到嘅阿里施蘇高，難怪早前熱身賽場場有失波喇。
「蝙蝠兵團」以攻代守

經過上季勇奪三冠嘅成功，賓菲加幾名功臣如拿沙馬高域、奧布拉克、加雷等先後被列強挖角，現時難免處於重組階段，近期熱身賽屢戰屢敗都幾肉酸，主帥佐治捷西斯亦希望藉酋長盃打番信心，戰意唔使懷疑。不過華倫西亞新教頭紐奴上季執教葡超里奧艾維殺入兩項盃賽決賽，咁蹺都係輸畀賓菲加，今次喺酋長盃狹路相逢，點都想報番一箭之仇，加上賽制除咗贏波獲三分、和波一分外，每入一球便會多一分，「蝙蝠兵團」自知後防不穩，實行以攻代守爭勝，有前冇後打死罷就之下，勢必合演入球騷，與其估邊隊會贏波，不如轉玩入球大好過。