侯城圍剿特倫辛

猪拉多纳

主場爆滿唔衰得

與眾同樂，侯城發惡！英超侯城喺歐霸盃第3圈外圍賽首回合同斯洛伐克嘅特倫辛打和0:0，今晚回師「虎穴」踢次回合賽事，聲勢大有不同。皆因呢場波係佢哋創會110年以嚟首次喺主場出戰歐洲賽，咁有意義難怪啲波飛一早售罄，有咁多鄉親父老入場支持，侯城梗係唔衰得畀人睇，1.87倍「讓主」撐得過。

（開賽時間：周五凌晨2:30）

由於有大批球迷話明會撐場，齋係個勢已令侯城球員信心大增。咪以為侯城會借機掠水，相反佢哋將大部分門票價格定為10鎊同特惠價5鎊，令唔少粉絲喜出望外，開售冇耐已經賣斷市。侯城之後又發聲明多謝球迷支持，咁識做，一班虎迷入到場自然更落力打氣啦。
布魯士落格殺令

雖然侯城首回合同對手互交白卷，但其實攻勢唔少，唔係中場侯度史東12碼宴客，佢哋一早取得領先優勢。新兵中場辛迪加斯、湯馬士恩斯表現對辦，加上中鋒謝拉域復出，有佢喺前面衝散對方防線，特倫辛想死守都難咯。難怪主帥布魯士落咗格殺令，話要令球迷盡興而歸，眾將肯定更落力數胡。

雖然話「不入虎穴，焉得虎子」，但睇番特倫辛上場喺自己地頭比賽都佔唔到咩甜頭，今晚仲點作惡先？而且佢哋上圈次回合作客禾獲甸拿慘吞3蛋，證明球隊客場易腳軟，今仗都係不宜沾手。
歐霸盃 首回合：侯客和0:0