CF阿美利加強悍掃雷

猪拉多纳

開鑼3連捷 順到冇朋友

墨西哥聯賽近年變天，以往「生招牌」瓜達拉哈拉沒落，取而代之係利昂同CF阿美利加雙頭馬車！今季開鑼後CF阿美利加一枝獨秀，成為唯一3戰全勝球隊，入波亦多，相當有霸氣，可以話係「銀行球隊」值得長追。CF阿美利加今輪作客堤格雷斯，阿King力撐CF阿美利加再下一城。

（周日早上8時開賽）
堤格雷斯對賽冇優勢

CF阿美利加矢志重奪聯賽冠軍，季前使咗唔少錢增兵，包括用破墨西哥聯賽轉會費紀錄嘅1,000萬美元收購射手奧利比柏拉達。呢位有份出戰今屆世界盃嘅墨西哥國腳首仗即貢獻助攻，幫球隊擊敗上季盟主利昂，上仗自己亦開齋，愈踢愈順，加上近兩場聯賽轟入4球嘅魯爾占美利斯，CF阿美利加鋒線絕對銳不可當。

堤格雷斯原本開局唔錯，但近期兼顧盃賽，令球員疲於奔命，匆匆再戰惡霸CF阿美利加，恐怕吃不消。堤軍近6次主場對CF阿美利加只係贏得1場咁大把，有地利都冇優勢，當然繼續追順開有條路嘅CF阿美利加。

另外蘇超開鑼，上季亞軍馬瑟韋爾早前已踢過歐霸盃，比賽狀態較佳，主場可望輕取弱隊聖美倫。德乙奧厄主場對波琴，兩隊上季為護級掙扎，屬於五五波，奧厄今季表現仍然冇起色，讓唔起波琴，要讓球客勝。