莫斯科打吡斯巴達唔赦戴拿模

猪拉多纳

今日晏晝俄超爆發「莫斯科打吡」，由莫斯科戴拿模主場硬撼莫斯科斯巴達。戴拿模有法國新兵華布拿上演「俄超地標戰」，不過呢位矮腳虎想攞頭威唔容易，畢竟斯巴達亦有兩大生力軍昆斯普美斯同舒洛哥夫助陣，加上佢哋向來唔赦戴拿模，平手盤捧斯巴達着數喎！

（now671台周日下午5:30直播）
鍾情40歲門將失肉酸波

由馬賽加盟嘅華布拿，上周中都有隨隊到塞浦路斯，睇住新東家喺歐霸盃第3圈外圍賽次回合以2:1擊敗基爾史莫納夏普爾。據《蘇維埃體育》報道，現年29歲嘅華布拿今日會為戴拿模處子登場，肯定成為俄超本周焦點。之但係咁，隊波明明有大把好龍門，偏偏教練卓捷索夫就鍾情比尼素斯基，呢位40歲門將上周中喺歐霸盃已經失咗球肉酸波，今場又有得擔正，頂唔頂得住斯巴達o架？
格食格近3次對賽全勝

你有華布拿，斯巴達亦有兩員新兵，會方前日宣布簽入荷蘭翼鋒昆斯普美斯同俄國防中舒洛哥夫，連同比耶列甸洛夫同卡斯唐等超班猛將，加埋前鋒摩域斯恩亦已經傷愈復操，齋計人腳都秤先過戴拿模。仲有喎，斯巴達近6次造訪戴拿模都未輸過，當中近3次仲全部贏晒添，平手盤唔係唔捧呀？