米爾頓凱恩斯大反擊

猪拉多纳

畀AFC溫布頓鬧過橋抽板

英聯盃今晚上演首圈賽事，其中前身係溫布頓嘅英甲球隊米爾頓凱恩斯，將喺主場迎戰由溫布頓球迷成立嘅英乙球隊AFC溫布頓。呢兩班波可以話係充滿恩怨情仇，今次喺英聯盃首圈就交手分屬「正名大戰」，肯定踢到飛沙劈石各不相讓，阿謙認為今場入波唔會少，捧入球大。

（TVB 301周三凌晨2時45分直播）
同氣連枝變仇人

講起溫布頓，唔少資深球迷都會記得佢哋當年曾經踢過英超同攞過英足盃冠軍；原來呢班波喺2002年由倫敦南部嘅溫布頓搬到白金漢郡新市鎮米爾頓凱恩斯，兩年後索性連球隊名都改做米爾頓凱恩斯（Milton Keynes Dons）。而溫布頓球迷就因為唔滿意球隊搬遷，所以自行組織咗另一支球隊叫AFC溫布頓。

講完兩隊嘅恩怨，係時候講番場波；米爾頓凱恩斯喺英甲首戰落後兩球下，連入四球反勝基寧咸表現出色，球員信心大增，近日更獲阿仙奴新星阿科比來投，相信佢哋攻力將會更加強勁。至於AFC溫布頓喺英乙首戰同梳士貝利踢成2比2平手，球隊前線有「大隻佬」艾堅芬華在陣有力取得入球，阿謙認為今仗雙方都為贏波搏到盡，入波唔會少，一於捧大盤。