紅魔捉蝙蝠立威

猪拉多纳

尹戈爾清洗7將迎奧脫福首戰

話咁快英超將喺今個星期六開鑼，曼聯喺季前最後一場熱身賽重返奧脫福球場，搵嚟華倫西亞拍跳，個個球迷都知紅魔喺「新魔君」尹戈爾領軍下全面復甦，喺國際冠軍盃呢個熱身賽重頭戲連殺多支勁旅，今場仲要係尹帥奧脫福處子戰，就更加冇得衰，誓要打響頭炮，「蝙蝠軍團」今場都係凶多吉少，捧讓球主勝啦﹗

（亞視本港台周三凌晨2時30分直播）

曼聯上季嘅死症就係莫耶斯未能激起班球員為佢搏命，個個都踢到頭耷耷，冇晒士氣，質素技術有幾高都冇用，今夏搵嚟管理高手尹戈爾，成功激起班球員嘅鬥志，當中以朗尼同艾舒利楊格就最明顯，前者唔再係名大於實，把握力、爆發力返晒嚟，「A楊」嘅表現更係好到令fans「喊出嚟」，原來爛泥都可以扶得上壁。
維達爾6.1億入魔

不過激活還激活，大清洗仍然在所難免，始終有部分球員唔啱新帥心水，據知尹戈爾喺今場賽前已經知會拿尼、拉菲爾達施華、費蘭尼、路爾斯安達臣、「小豆」查維亞靴南迪斯、韋費特沙夏同威爾堅尼呢七名球員可以離隊，至於早前被認定會被踢走嘅香川真司，就會留隊做「小三」，作為桑馬達同安達靴里拉嘅後備。有出就有入，據知傳咗好耐嘅目標維達爾好快就會以轉會費4,700萬鎊（約6.1億港元），由祖記轉投曼聯，其經理人前日抵達英國準備同曼聯終極會面，呢位智利國腳尋日隨祖雲達斯喺澳洲踢熱身賽，被影到為一名遞上曼聯波衫嘅球迷簽名，真係好事近喎！

近五仗僅一勝嘅「蝙蝠軍團」華倫西亞今場注定冇運行，呢場波除咗係尹戈爾首度喺奧脫福領軍外，過幾日英超又開咧，今場唔會再好似對上幾場咁以試陣為主就住嚟踢，料會強陣出擊，贏波打出信心之餘，更為尹帥喺球迷面前樹立好形象，讓球主勝咪走雞！