多蒙特拜仁甩色大戰

猪拉多纳

世盃後遺症 焗排殘陣爭盃

新一季德甲要等到下周末至開鑼，今晚先行上演德國超級盃，由上季德國雙亞王多蒙特主場迎戰雙冠王拜仁慕尼黑，兩軍向來係死敵，加上近季拜仁不斷向多蒙特作出惡意收購，每季都撬走多蒙特主力，令雙方關係更加緊張，今晚交鋒火藥味濃。不過，雙方都係世盃後遺症受害者，多名國腳無法參與季前備戰，今仗大家焗排殘陣爭盃，尤其雙方防線都唔齊腳，甩漏難免，今仗入波唔會少，大盤好路！

（有線61及64台周四凌晨零時直播）

今場德超盃係過去兩屆嘅翻版，近兩季雙方各在主場贏過一次，今晚多蒙特佔主場之利，但受世盃影響，季前準備比去季差得遠，防線鐵三角維丹費拿、侯姆斯同蘇保迪完全冇參與季前集訓，國腳艾歷杜姆啱啱歸隊，成條防線面目全非，加上主力馬高列奧斯、巴拉斯基高斯基同根度簡啱啱傷愈唔敢貿然上陣，前線喺羅拔利雲度夫斯基離隊後亦面臨重整，今晚個殘陣到暈，球隊啱啱喺熱身賽淨吞利物浦4蛋，但呢場大敗亦係及時嘅Wake Up Call，肯定會提高今仗警覺同戰意，主場遇仇家當然會同對手駁火。
羅拔仔倒戈搶士哥

拜仁情況同多蒙特差唔多，一眾國腳包括紐亞、拿姆、舒韋恩史迪加、湯馬士梅拿、馬里奧葛斯、謝路美保定、丹迪同洛賓都係啱啱歸隊，又有堤亞高艾簡達拿、列貝利同拿菲爾三名傷兵掛免戰牌，教練哥迪奧拿為今仗排陣頭痛不已，好可能要起用小將賀積查治甚至未有一隊經驗嘅新仔哥奧甸奴擔正，防線亦會起用養傷近一年嘅畢斯杜巴打中堅，作客去到西法倫球場好難保持不失。不過前線有羅拔利雲度夫斯基倒戈掛帥，威力更勝上季，呢位焦點人物對番舊東家一定冇情講。
22倍「主客」博得過

如果大家嫌入球大賠率奀，可考慮博吓半全場，多蒙特慘敗後，比賽初段定會打醒精神，遇上後防天殘地缺嘅拜仁甚有機會取得先機。不過，拜仁一班世盃國腳重新投入準備嘅時間比多蒙特國腳早，上場熱身賽對美職明星隊嘅下半場佢哋都先後入替，今場如半場落後，隨時會喺後備上陣救亡，以佢哋嘅質素有力逆轉，半全場「主客」有22倍勁好分頭，值得小注一試。　
領隊Chit Chat

哥迪奧拿（拜仁慕尼黑教練）：我哋陣中現時有唔少傷兵，但我對球員有信心，多蒙特係一支強大對手，每次同佢哋交鋒，都係重大挑戰。

高普（多蒙特教練）：我哋真係好想贏呢場波，雖然羅拔利雲度夫斯基轉投咗拜仁，但我仍然好高興同佢相遇，因為佢係一個好人。