卡城征高地吼上盤

猪拉多纳

降班無阻陳志遠揼水

提起卡迪夫城，唔知大家會唔會同科娜一樣，第一時間就諗起佢哋嘅騎呢班主陳志遠呢？呢位仁兄憑住一身「潮着」打扮搶晒鏡，又試過迷信到增兵要「夾八字」，上季英超有佢同「卡城」，真係有好多好戲睇，最開心一定係班花生友啦！呢隊「卡城」今晚會喺英聯盃首圈作客英甲嘅高雲地利，班主雖然騎呢，但領隊蘇斯克查一啲都唔騎呢，有力帶領球隊贏波而回，今場讓平半，點睇上盤都算抵玩！

（TVB 301周四凌晨2時45分直播）

馬來西亞華裔商人陳志遠自從收購咗卡迪夫城後即時Hit爆全球，呢位肥佬老細成功以「波衫×恤衫」加「打呔×攝西褲」等騎呢Mix and Match吸引鏡頭注目，又強行將球會嘅標誌由「藍鳥」變「紅龍」，球衣代表色亦都由傳統藍色變成紅色，搞到球迷勁不滿，可惜球隊表現冇呢位班主咁搶鏡，結果降落英冠，掛住陳生嘅朋友惟有睇英冠或者盃賽。
簽入馬捷達等卡士球員

其實陳志遠都唔係只做騎呢嘢，佢季內不斷向球會注資，買人毫不手軟，喺「卡城」降班後，費沙甘保、哥爾卡、加利美度、佐頓梅治等主力離隊他投，陳生仍然出錢全力支持領隊蘇斯克查買人，包括方祖同馬捷達等具卡士球員，希望盡快爭番上英超，球隊實力並未有大幅削弱，今場作客英甲嘅高雲地利絕對有力取勝。

高雲地利雖然有主場之利，但都係專心聯賽好過，呢隊波上季因財務問題而被扣10分，搞到爭啲要降班。高雲地利防守唔太穩陣，面對火力強大嘅「卡城」，主場出戰都不宜高估，上盤值得捧場。