飛燕諾未弗焗打守細波

猪拉多纳

今晚有場荷甲獨腳戲，飛燕諾主場迎戰海倫芬，飛燕諾呢支荷甲勁旅自從98至99球季後就再冇奪過荷甲冠軍，今季又有多位後防主將離隊，就更難衝擊冠軍席位，依家先啱啱開咧，兩軍球員狀態都未操起，今場波入球中位數開到3.5球，阿King建議捧細盤。

（now 670周六凌晨2時直播）

由於飛燕諾三大後衞迪維積、真馬特同馬田斯恩迪喺今夏世盃代表荷蘭國家隊表現出色，好自然畀海外大球會撬走，唯一慶幸嘅係中堅馬菲臣同中場主力佐迪卡斯仍在陣中，另外亦從今場對手海倫芬撬得19歲翼鋒巴沙治古路，不過呢位新兵尚未融入隊波，上場正選上陣表現平庸。飛燕諾上場開咧戰對海牙贏得極之辛苦，要去到完場90分鐘先靠前鋒米素爾迪維迪省入一粒贏1比0，可見飛燕諾實力削弱之餘球員仲未進入狀態。海倫芬上場主場反敗多德勒支1比2，今場料會以守為主，避免兩連敗，入球細值捧。
法乙吼歐塞爾半場和

另外講埋兩場法乙賽事，歐塞爾主場對奧連斯，兩軍都喺周中法聯盃踢足120分鐘，大家都要時間回一回氣，預料今場都唔會一開波就搶攻，半場和博得過。最後南錫主場鬥阿勒斯，阿勒斯作客例牌腳軟，主勝咪走雞﹗