錫周三開靚頭唔赦打比郡

猪拉多纳

闊別一個月後，肥叔再次同大家見面，祝各位讀者新一季贏多啲。自世界盃開始，各地莊家開盤都非常謹慎，以往唔少十足水盤口，都被壓至七水，甚至冚晒成個盤，無非都係驚被打爆莊，來緊要搵筍盤，可能比以前困難。頭炮向較正氣嘅英國波埋手，英冠錫周三今季演出脫胎換骨，連作客腳軟弊病都克服咗，今仗主場對打比郡，仲要有得受讓，下盤屬首選。

（周六晚10時開賽）

睇番錫周三首輪到訪爭升班分子白禮頓，踢得有板有眼，最後更全取3分，充滿說服力，可見球隊季前有落一番苦功。其實錫周三呢班波人腳唔差，唔少球員出身自英超球會，只要開好個頭，打起信心，表現會愈來愈好。對手打比郡要讓波，好大程度上因為上季成績好，評級較高，但實際上未必高得過錫周三幾多，首仗主場對新升班嘅洛達咸，都要苦戰至比賽末段先至驚險贏波，讓唔起當起嘅錫周三。

英超方面，阿仙奴喺社區盾大勝曼城，來勢洶洶，但要留意佢哋將於下周中歐聯附加賽作客比錫達斯，關乎球隊龐大經濟利益，所以今輪主場對水晶宮，未必去盡，普遍莊家開緊阿仙奴讓球半、兩球，實在太辣，寧揀下盤。