賓帥寫「包」單 拿玻里W得

猪拉多纳

同晚另一場歐聯附加賽首回合重頭戲，意甲拿玻里主場對西甲畢爾包，眾所周知，拿軍嘅西班牙籍教練賓尼迪斯係盃賽專家，亦係歐聯冠軍級名帥，領軍功力深厚，而且對於祖國球隊畢爾包瞭若指掌，淨係「賓帥元素」，拿玻里已值得睇高一線。畢爾包闊別16年後再戰歐聯，經驗輸一大截，恐怕要先交「學費」，簡單啲直取要主W。

（有線64、203台周三凌晨2時45分直播）

賓尼迪斯05年帶領利物浦贏歐聯，07年再入決賽，去年教車路士又捧歐霸盃，堪稱歐洲賽大師。拿玻里上屆由佢執教下，分組賽獲12分，無奈因對賽成績較差出局，但已贏盡口碑。最重要係賓帥曾於西甲打滾多年，早已對畢爾包有深入研究，對手有乜板斧，逃唔過佢雙眼。另拿玻里陣中有唔少前西甲兵，包括希古恩、荷西卡利祖、艾比奧爾，早前借入咗史雲斯嘅西班牙前鋒米捷。希古恩以往多次射破畢爾包大門，勢成對手心腹大患。
畢爾包唔夠卡士

畢爾包對上一次出席歐聯已經係1998/99年球季，當時分組賽包尾出局。呢支西班牙巴斯克地區球隊，傳統上重用本土球員，目前只有法國後衞拿樸迪一名外援，卡士明顯未夠，加上中場主將安達靴里拉去埋曼聯，會方冇又簽入具級數新兵，更難喺歐聯立足，作客凶多吉少。