賀芬咸漢堡升呢要吼實

猪拉多纳

新一季德甲周六凌晨展開，睇過各隊轉會情報同季前備戰，黑柴揀咗三隊同大家分析，賀芬咸同漢堡今季都大事擴軍，實力遠勝上季，可視為銀行球隊。前季搞到幾乎降班嘅賀芬咸，最終憑救火教練基斯度幫手幸免於難，上季球隊喺佢調教下最終以第9名過終點。不過富豪班主霍普野心極大，季前針對上季後防孱弱問題重整陣容，以600萬歐元買入弗賴堡門將奧利華包文，另外仲撬走法蘭克福副隊長派文舒維加，加上布倫瑞克嘅最佳後衞畢卡錫，防線硬淨好多，球隊季前準備充足上晒力，預料季初即有料到。

漢堡上季差啲降班，大難不死後搵番前體育總監比亞斯多化回歸，立即進行大清洗，佢仲搵埋富豪老朋友古恩幫手，呢位漢堡Fans喺德國富豪榜排名第8，提供咗2,500萬歐元資助，除留住高薪隊長雲達華治外，亦買斷咗優質箭頭拉蘇加，季前再購得史泰比、比哈美、尼古拉梅拿等猛將，整體實力大增，今季隨時可以進佔聯賽榜中上游位置。
法蘭克福大盤恩物

而另一支值得留意球隊法蘭克福，請得進攻大師舒哈夫出山，但季前多名中後場主力離隊，防線有排執，舒哈夫踢法向來有前冇後，今季仲借得車路士優質巴西中場盧卡斯皮亞桑嘅中場領軍，前線又買入施費洛域攻堅，佢加盟法蘭克福後迅速上力，較早前熱身賽對國際米蘭梅開二度，跟住德國盃對柏林域陀尼亞亦首開紀錄，預示佢有足夠能力協助舒哈夫領導嘅法軍大踢進攻足球，可以預視法蘭克福絕對係大盤客恩物。