富咸補鑊搵狼隊開刀

猪拉多纳

年輕人總有犯錯嘅時候，小錯如考試中出貓作弊，大錯則如演藝明星涉沾毒，無論係犯下大錯定小錯，最緊要係知錯能改。富咸今季降到英冠後，領隊馬加夫將未來押注喺一班年輕小將身上，卻換嚟兩連敗戰績，今晚呢支年輕球隊將喺主場對升班嘅狼隊，阿King相信富咸能夠從錯誤中學習成長，為反彈贏波會全力拚搏，加強埋門把握力，入球大值博。

（周四凌晨3時開賽）

富咸呢支升班大熱竟然開咧頭兩場全敗，真係一地眼鏡碎；上場主場對米禾爾喺早段失波都未能扳平，全因「魔鬼教頭」馬加夫重用年輕球員，上場正選之中有七位球員係只得十八至廿一歲，包括十八歲威爾斯翼鋒佐治威廉斯同廿一歲德國中場伊斯菲特。不過呢班後生仔上場並唔係踢得差，全場共有十六次射門，有七次射中龍，但就輸在太過性急同把握力差，最尾輸畀米禾爾0比1。

賽後領隊馬加夫仍然袒護呢班後生仔，對佢哋投下信心一票，可見佢哋係有潛質，只需要改善一下把握力同心理質素，今場對住有後衞史堤芬禾特離隊嘅狼隊，入球大有望開出，更可旗開得勝。
急流銀河和味濃

另外聽朝有兩場美職，科羅拉多急流主場對洛杉磯銀河，兩軍各有主將休戰，實力受削，和波值捧。最後西雅圖海灣者主場迎戰聖荷西地震，海灣者有主將馬田斯回歸，贏波冇難度！