戴拿模遇弱旅有鑊氣

猪拉多纳

今晚仲有四支俄超球隊喺歐霸盃出場，當中實力嚴重下滑嘅羅斯托夫作客對土耳其特拉布宗最唔樂觀，Anton相信特拉布宗1.62主勝可以視為過關膽，至於莫斯科戴拿模同莫斯科火車頭分別遇上塞浦路斯球隊，當中以主場出擊嘅戴拿模更有信心，主場炒得起奧摩尼亞，推介1.82倍讓球主勝。

（周四晚11時30分開賽）
奧摩尼亞主力四散

俄超球隊今季同塞浦路斯球隊好有緣，較早前歐聯外圍賽，兩國聯賽班霸辛尼特同AEL利馬素就曾經碰過頭，結果辛尼特喺主場大勝三球，足見兩個聯賽水準相差甚遠，今場呢隊奧摩尼亞只係上季塞爾維亞甲組聯賽第五名，實力遠遠不及AEL利馬素，季前更放走咗幾名主力，繼續降呢！何況佢哋本土聯賽未開咧，作客去到莫斯科等做炮灰！

莫斯科戴拿模目前喺俄超僅次於班霸辛尼特之後排第二，今季唯一敗仗係主場負另一勁旅莫斯科斯巴達，不過該役有兩個入球被枉判詐胡，加上先中楣後中柱，輸得認真冤枉，球隊本身級數遠勝奧摩尼亞，加上前線兩大殺手古蘭爾同高哥連狀態巔峰，今晚主場出擊遇弱旅，贏兩球係最低消費。