皇馬攞冠軍畀你體

猪拉多纳

11場擸4錦標 卻奧斯好運照住

話咁快西超盃今晚上演次回合，輪到馬德里體育會返主場再鬥皇家馬德里。「銀河艦隊」球星如雲，最矚目嘅梗係上仗開齋嘅「J神」占士洛迪古斯喇，不過唔好忘記仲有另一新援卻奧斯，呢位德國中場係天生大贏家，好波又好運，佢力爭近12場以來嘅第5項錦標，上仗符碌追和嘅馬體會頂唔住，斯維力撐皇馬1.65倍「冠軍」。

（now 632周六凌晨4時30分直播）

首回合皇馬喺主場出擊，雖有「J神」占士洛迪古斯入替傷出嘅王牌C朗後成功開齋，但馬體會末段靠角球戰術門前混戰僥倖追成1比1，留番今仗再決高下。挾住世盃神射手之名上「艦」，身價高達8,000萬歐元嘅「J神」無疑係星中之星，由於王牌C朗拉傷肌肉隨時唔踢得，呢位哥倫比亞球星定必要擔大旗。當大家將焦點放晒喺「J神」之際，另一新援卻奧斯靜靜地征服「皇粉」，呢名德國世盃冠軍功臣擅於掌控比賽節奏，無論長傳定短傳都非常準繩，就算上「艦」冇耐亦全無怯場感覺，隨住33歲嘅沙比阿朗素漸走下坡，卻奧斯好大機會接過佢留低嘅中場指揮棒。
馬體會變動大未融合

90年出生嘅卻奧斯乃天生大贏家，年紀輕輕已盡攬世盃、歐聯等大賽錦標，更令人驚訝嘅，係佢喺之前11場正式比賽中，先後勇奪德甲、德盃、世盃及歐超盃冠軍，真係好運到冇朋友。其實馬體會首回合都係採取上季嘅瘋狂逼搶打法，但迪亞高哥斯達、菲臘比路爾斯等多名骨幹離隊，文迪蘇傑、基沙文、施古爾拉等新兵仍需要時間適應，況且連主力阿達杜倫都缺陣，雖然今仗0比0完場馬體會都攞冠軍，但不宜高估，卻奧斯係時候擸埋近12場以來嘅第5座冠軍獎項，皇馬嘅「冠軍」賠率有1.65倍咪嫌少。