半場和風繼續吹

猪拉多纳

愛華頓冇火 阿仙奴冇態

阿仙奴連續兩周都喺星期六英超壓軸戰登場，今晚則作客「黐牙拖肥」愛華頓。雖然阿仙奴開鑼日險勝水晶宮，但佢哋撞正隊長阿迪達受傷，「德國三寶」又未夠弗，今仗又夾喺兩場歐聯附加賽中間，「廠仔」未回得切氣之下，初段玩拉布唔奇，而且雙方交手好旺半場和，值得追多鋪。

(now 621周日凌晨零時30分直播)
德國三寶未操起

從開咧戰補時絕殺水晶宮，到周中歐聯附加賽首回合作客幾經辛苦悶和比錫達斯，睇得出阿仙奴眾將狀態普通，貴價新援阿歷斯山齊士仲未同隊友夾熟，雖然「德國三寶」奧斯爾、梅迪薩卡及普多斯基已經可以候命，但佢哋歸隊後操咗一周多啲唔慌弗，後者更有傳會被賣去土超加拉塔沙雷，唔多信得過。至於喺比錫達斯之役傷出嘅隊長阿迪達，至少要抖兩周，今仗肯定唔可以倒戈舊東家，加埋耶耶辛洛高及基蘭基比斯都因傷倦勤，整體實力削弱不少。

愛華頓上季喺主帥馬天尼斯改造下漸變技術流，又不失前場瘋狂逼搶嘅體力化踢法，絕對係一粒「黐牙拖肥」，不過首仗踢落冇乜火氣，臨尾更大意遭實力較弱嘅升班球隊李斯特城逼和，反映出中場冇咗巴克里後，攻守轉換速度減慢嘅問題，呢位新星仍要養傷6周，馬帥或會保守行先。
上半場唔敢亂駁火

阿仙奴啱啱先踢完歐聯附加賽首回合攰到爆，邊有咁快回到氣，而且嚟緊周中又要踢次回合，能否出線關係到億億聲嘅收入，「廠仔」難免有所顧慮，今仗作客勢必拖慢比賽節奏；而「拖肥」亦唔敢輕舉妄動，胡亂駁火，初段隨時悶戰一場，況且雙方近5次交手有4次開半場和，斯維認為今仗睇好半場和風會繼續吹，而且2.12倍亦相當吸引，梗係博得過啦！