馬拉加細盤好路

猪拉多纳

「Sam哥」把關包冇衰

西甲今晚開鑼，揭幕戰由馬拉加主場對畢爾包，昔日「暴發戶」馬拉加雖然已爆煲，但今夏仍簽下墨西哥「Sam哥」奧祖亞，呢位鋼門喺今屆世盃對巴西一役演出神勇，技驚四座，馬拉加有佢把守最後一關，後防令人放心。畢爾包將於下周中歐聯附加賽次回合鬥拿玻里，難免會有保留，捧入球細。

（now 632、TVB 13周日凌晨1時直播）

馬拉加炒咗德國名帥舒斯達後，今季請來44歲教練加西亞領軍，最矚目係羅致「Sam哥」奧祖亞，呢位29歲門將反應極快，今屆世界盃鬥巴西奇迹地撲出尼馬嘅必入頭槌，相信球迷仍記憶猶新，有佢把關想攻破馬拉加大門，恐怕唔容易。不過馬拉加中前場人腳質素麻麻，入波把握亦唔大，遇上上季第4位嘅畢爾包，攞到1分已有交代。
西維爾未執掂難讓華倫

畢爾包防守中場安達靴里拉轉投曼聯後，並冇簽入具級數球員，以其人腳要兼顧西甲及歐聯雙線作戰，可謂相當困難。畢爾包喺歐聯附加賽首回合作客同意甲拿玻里打和1比1，周中再交鋒屬生死戰，權衡輕重應會以歐聯行先，預料今仗聯賽唔會去盡。

另一場稍後時間矚目之戰，西維爾主場對華倫西亞，西維爾中場主力拿傑迪錫離隊，對球隊打擊好大。早前歐超盃對皇馬完全捱打，熱身賽表現亦未如理想，恐怕仲需要時間磨合，讓唔起華倫西亞，要讓球客勝。