「紅色及時雨」拯救曼聯

猪拉多纳

雖然曼聯聯賽開鑼戰輸咗畀史雲斯，但球迷唔好太失望，Peter相信主帥尹戈爾係有料之人，一定好過上任莫耶斯。而且尹帥早前更表明教完曼聯就退休，Peter相信每位教頭都想急流勇退，好似費格遜同Peter自己都係咁。

英超係踢38場嘅，衰開頭總好過衰收尾。尹戈爾上場後冇即刻逼老細買人，反而用唔少時間藉訓練同熱身賽睇到球會嘅不足，紅魔現時左面明顯較弱，所以就睇中後生嘅阿根廷左後衞馬高斯盧祖。呢位球員嘅英文名「Rojo」，喺西班牙文解作紅色，而佢可踢3-5-2陣式嘅翼衞，亦能打中堅位置，可謂功能多多，所以Peter認為佢係「紅色及時雨」。
莫帥摸熟 可「笑到最後」

Peter覺得一個教頭新接手一支球隊，冇耐性嘅先會係咁買人，有料教頭係唔會輸一兩場波就自亂陣腳。Peter認為今季英超水準會比舊年高同好睇，冠軍將離不開阿仙奴、車路士、利物浦、曼聯及曼城5隊，熱刺同愛華頓都係有份踢冇份捧盃嘅球隊。喺呢5隊當中，Peter較睇好車路士可以「笑到最後」，因為主帥莫連奴係有料之人，上季講明球隊係拎唔到冠軍，經過一季嘅摸索後，今季買咗唔少幫到球隊嘅人，相信係時間做嘢啦！

英超係長途賽，球隊實力強加上板櫈深度夠自然較着數。今日係8月23日，Peter大膽預測車路士可贏到今季冠軍，球迷們信唔信就自己決定啦！