阿仙奴強戰拖肥 德國3寶開攻大吉

猪拉多纳

世盃冠軍功臣歸位！

愛華頓領隊馬天尼斯上季接莫耶斯棒，帶領愛華頓創佳績，最尾「拖肥」仲爬過傳統勁旅熱刺同曼聯頭，拎到英超第5位添！馬帥話新季目標係殺入前4，今晚佢哋主場迎戰鋒力強勁嘅阿仙奴，兩隊都係攻優於守，而且「兵工廠」仲有德國三寶回歸助陣，大家都咁「猛火」，今晚應該會上演一場入球騷，撐1.8倍「入球大」啦！
阿迪達傷足踝無緣倒戈

「兵工廠」新隊長阿迪達喺歐聯附加賽對比錫達斯扭傷足踝，今晚將會缺席對愛華頓嘅倒戈大戰，令阿仙奴原本嘅防中弱點更加弱。好彩，阿仙奴雖然防守麻麻哋，但勝在一班攻擊球員當弗，上季由「死神」變做「戰神」嘅艾朗藍斯表現突出，上季佢為阿仙奴射入16個波，最後仲當選埋球隊最佳球員添，上仗佢喺歐聯食紅牌，嚟緊周中場次回合唔使預佢，換言之，「藍神」今晚可以全力搏殺爭士哥，將功補過啦！

仲有呀，世盃冠軍功臣、德國3寶奧斯爾、普多斯基同梅迪薩卡，歸隊後搏命催谷狀態，今晚終於可以為阿仙奴披甲，「兵工廠」有佢哋孭飛，配合慢慢融入隊波嘅超級翼鋒阿歷斯山齊士，鋒力肯定勁到冇朋友啦！只可惜，阿仙奴件正選左閘基蘭基比斯打咗柴，要由蒙利爾頂上，防守難免出現漏洞，隨時前面入埋唔夠後面輸囉。
巴克里打柴靠盧卡古食胡

另邊廂嘅愛華頓，佢哋上季嘅主場威力大家有目共睹，即使中場巴克里受傷缺陣，但「小魔獸」盧卡古衝得撞得兼射得，鋒力應該唔成問題。睇埋兩軍對賽數據，原來近兩次愛華頓同阿仙奴交手，都係開出入球大，總入球數字分別係3球同5球，咁好路，今晚點可以唔追多鋪先？一於捧中位數2.5球嘅「入球大」啦！
Data King：阿仙奴英超多波入

‧愛華頓對上6次英超主場出擊，5次開出入球大。

‧阿仙奴對上6場英超，當中5仗至少攻入2球。

‧愛華頓近5次主場鬥兵工廠，3次開出入球大。
乜都玩錦囊：博奧斯爾11倍首球

阿仙奴德國3子今晚第一次喺新季英超亮相，點都要做番齣好戲，而且佢哋3個捧完世盃後放假叉足晒電，體能佔優，考慮到普多斯基未必正選，梅迪薩卡後上入波亦唔多，倒不如博一博奧斯爾首名入球，有11倍，抵玩！
盤路解碼

愛華頓上季51戰，29場開大！