紅牛向季後賽「衝」刺

猪拉多纳

唔經唔覺美職已經踢咗接近三分二，但蒙特利爾衝擊仲有項羞家紀錄，就係唯一一支作客未開齋嘅美職球隊。聽朝佢哋將會作客向季後賽目標進發嘅紐約紅牛，睇怕唔慌有運行，撐2.4倍「讓主」。

（TVB301周日早上7:00直播）

表面上蒙特利爾衝擊近4戰贏3場成績亮麗，之不過其中兩場係中冠盃賽事。齋計美職，其實佢哋近8場輸足7場，真係睇見都唔開胃。睇見季後賽機會愈見渺茫，球隊專注中冠盃都唔出奇，出戰聯賽鬥心成疑。

相反紐約紅牛逐漸上力，兼且主場發揮穩定，4次主場出擊取得3勝1和不敗佳績。而且佢哋已經抖咗接近兩個禮拜，養精蓄銳下要打低前日先遠征完薩爾瓦多嘅衝擊應冇難度。