西維爾喪攻華倫做大騷

猪拉多纳

巴塞借將補充火力

今晚西甲開鑼日，即有兩支實力分子對壘，西維爾主場鬥華倫西亞。西維爾今季雖有隊長拿傑迪錫轉投巴塞隆拿，但亦由巴塞借入潛質新星迪路菲奧，加埋留隊嘅前鋒卡路士巴卡同加美路等，鋒力未必有大影響。不過西維爾防線一向唔穩陣，面對實力旗鼓相當嘅華倫，不宜追捧，轉玩1.8倍入球大划算。

（開賽時間︰周日凌晨3:00）

西維爾早前喺歐洲超級盃面對皇馬，狀態未算十足，畀皇馬嘅壓力唔算大，最終以0:2落敗實屬正常。以該仗表現，由法斯奧所領導嘅防線並唔穩健，何況上季表現突出嘅左閘摩蘭奴仲轉會利物浦，今晚要保持不失有難度。

前線方面，加美路同卡路士　巴卡上季喺聯賽合共攻入29球，火力強勁，連埋兩位借將迪路菲奧同艾斯巴斯，要填補拿傑迪錫嘅位置問題唔大。
華倫後防唔掂8場熱身賽例失波

對手華倫西亞今季同樣有隊長馬菲奧離隊轉投巴塞，由季前8場熱身賽所見，無論對手強弱，華倫都有失波，足證馬菲奧離隊對後防有一定影響。不過一對前鋒柏高艾卡沙同莊拿斯干卡維斯質素唔錯，配合經常後上嘅菲侯利，要攻破西維爾大門有幾難？兩隊入得又失得，入波又點會少呢？