巴塞打殘艾爾切

猪拉多纳

美斯弗爆冇尼馬一樣掂

巴塞隆拿今個夏天斥巨資掃貨，簽入蘇亞雷斯、華美倫同拿傑迪錫等生力軍，咁多動作無非想重奪西甲錦標，重振「地上最強」聲威。今晚佢哋喺新季西甲第一擊主場恭候艾爾切，就算尼馬受傷缺陣，靠回勇嘅美斯衝鋒陷陣都夠照，巴塞讓到「-2」都冇有怕，捧1.58倍「讓球主勝」，撐新帥安歷基打響頭炮！

（now632台周一凌晨3:00直播）
巴塞後防雙星養傷

域陀華迪斯、法比加斯同阿歷斯山齊士相繼離隊，靈魂佩奧爾又決定掛靴，加上蘇亞雷斯要到10月先坐完波監，新加盟嘅門將達史特根同中堅華美倫亦養緊傷，唔少人都睇死巴塞季初唔掂。不過張峰咁睇，巴塞畀人睇淡，反而有利球員減輕壓力，況且以佢哋現有人腳級數，開鑼戰要砌低艾爾切根本冇難度。
艾爾切兩大王牌走人

新隊長沙維賽前就向教練安歷基投以信心一票，睇好佢可以帶領巴塞重返正軌，捧走重要錦標，呢番言論無疑有助穩定軍心。雖然話前鋒柏度洛迪古斯剛啱傷愈，只係操咗一課，尼馬亦喺操練扭傷左腳足踝唔出得，但美斯喺季前熱身賽有幾Fit大家有眼見，新兵拿傑迪錫亦好快融入咗球隊踢法，加埋夏達迪呢件超新星，對住艾爾切夠殺啦！

之所以睇小艾爾切，皆因呢班波上季要去到最後一周先護級成功，全季只入得30球波，首席射手耶當保亞基同埋中場山齊士摩蘭奴今季仲要走埋，今晚睇怕破蛋都有難度喎！相信巴塞要喺魯營大勝一場易如反掌，進取啲當然博「讓主」啦！
巴塞魯營第1擊例入5粒

巴塞上季聯賽19次主場出戰，12場至少攻入對手3球。

巴塞連續3季聯賽主場首戰至少攻入對手5粒。

艾爾切上季19場聯賽作客僅得2仗保持清白身。
巴塞3.5球照「大」屠殺

巴塞今季捲土重來，今晚主場出擊唔單止要打響頭炮，仲要大數一場攞彩。事實上佢哋有鋪聯賽主場首戰炒人癮，今場對手只係實力一般嘅艾爾切，大屠殺睇怕走唔甩，就算入球中位數去到3.5，照追1.7倍入球大。
盤路解碼

巴塞上季27次開「讓主-2」一共16次贏盤