皇馬細贏科爾多瓦

猪拉多纳

C朗第250次上陣！

皇家馬德里今晚喺主場對科爾多瓦，未必炒得起對手。睇數據就知，對上15季，原來皇馬喺開咧戰幾乎例牌令人失望，當中更加得2場全場入球數字多過3球，呢場入球大細中位數開到3.5球，不如玩2.29倍入球細，即使C朗今場若上陣會係佢第250場皇馬賽事，但有傷在身嘅佢狀態成疑呀！

（now632台周二凌晨2:00直播）
皇馬季初例撻唔着

「銀河艦隊」每年都係西甲冠軍熱門，但估唔到，對上15季聯賽，佢哋得1次淨勝對手多過2球，同時得2場全場入球數字多過3球，除咗11年作客以6:0大勝薩拉戈薩，幾乎每季撻唔着，證明皇馬有季初病，旨意佢哋開「讓球主勝」，似乎唔多穩陣，畢竟皇馬太多球星要踢世盃，又要去美國宣傳搵錢，季前備戰都輸蝕晒啦！

C朗如果落場，就會係佢第250次披起皇馬球衣比賽，之前249場波佢射入驚人嘅254球，可惜喺西超盃首回合受傷後，次回合只係後備上陣，就算皇馬失落西超盃後，教練安察洛堤希望省番靚招牌，恐怕都有心無力。唔好忘記，新加盟嘅中場占士洛迪古斯同卻奧斯，仲未同隊友夾熟，賓施馬個款又好似仲放緊假，「同花順」最有威脅力得番加里夫巴利，真係有可能喺國際冠軍盃同西超盃後，衰多鋪令球迷失望。
科爾多瓦料防守為先

對家科爾多瓦上季喺西乙得第7名，只係靠升班附加賽得到西甲席位，仲要得費倫天拿前鋒懷達馬圖斯同華倫西亞中場卡達比亞以借用身份加盟，曾經被視為日本國家隊希望嘅維迪斯中鋒夏雲拿，最後更去唔成巴西世盃，牌面當然同皇馬冇得比。今場科爾多瓦肯定會擺出死守格，或者趁皇馬未上力，幫到手開入球細喎！