辛尼特-1照達標

猪拉多纳

「變形俠醫」火力返晒嚟

歐聯附加賽次回合，辛尼特主場對標準列治，鬼Sir有份評述此戰首回合比賽，認為俄超勁旅辛尼特高一班波，如非領先後有所鬆懈，唔止贏1比0，今仗返回自己地頭，應會出真工夫盡數對手，以射手「變形俠醫」侯克近期勇態，入波唔成問題。比利時球隊標準列治形勢迫使佢哋焗攻，隨時得不償失，鬼Sir睇好辛尼特開出讓球主勝。

（有線61、64、201及203台周三凌晨零時直播）

辛尼特話晒係上屆16強分子，僅被多蒙特淘汰，加上由前熱刺主帥保亞斯領軍，級數自然有番咁上下。佢哋首回合佔上風，一早取得領先優勢，可能受到嘅壓力較小，換邊後更出現輕敵情況，幾乎被追平。吸取教訓後，辛尼特今仗實打醒十二分精神，盡快入多幾粒，令對手冇得翻身。
標準列治失兩射手散晒

值得一提，辛尼特陣中巴西前鋒侯克擺脫世盃演出低迷陰影，今季俄超表現非常Sharp醒，開咧後5場入5球助辛尼特聯賽全勝排榜首。上輪對阿馬卡一仗更轟出時速達176公里嘅「火箭射球」，勁過晒米赫洛域同卡路士等「重炮手」，標準列治防線遇上佢，真係好危。

上季比甲冠軍標準列治季前流失兩位正選射手巴舒亞易及伊斯基，導致今季成績大倒退，近4仗輸3仗失9球，去到歐聯更加唔夠班，淨輸兩球好正路。