利華讓得辣寧歎大哈

猪拉多纳

過去兩屆歐聯分別成為德甲及西甲球隊天下，呢兩大聯賽球隊出場往往獲秤先，德國捧埋世界盃，令德甲球隊光環更閃耀，但其實各隊水平參差，拜仁慕尼黑同埋以佢哋球員為骨幹嘅德國隊，能夠喺球壇稱王稱霸，唔代表其他德甲球隊一樣掂，切勿盲目高估，今晚歐聯附加賽次回合，利華古遜已有一球優勢，主場仲要讓哥本哈根球半、兩球，盤口太過辣，寧揀下盤及入球大。

（有線62、202台周四凌晨2時45分直播）

利華古遜開季後表現的確搶眼，踢法進取連續贏波，入波又多，自然獲莊家睇好。不過能夠出戰歐聯嘅球隊，亦非泛泛之輩，哥本哈根畢竟屬於丹麥班霸，亦係上屆分組賽分子，首回合即使輸2比3，但話晒都攻入利華兩球，有一定質素，今仗背水一戰，更加會豁出去一博，表現會更放，遇上好搶韁嘅利華古遜，無疑係大盤格局。
維拉鬥心不明要奧連特

除咗歐聯之外，不妨留意吓英聯盃，英超阿士東維拉主場對甲組奧連特，唔好以為維拉好易啃，事關佢哋攻力麻麻，而且依家只係第2圈賽事，隨時派副選出擊，不宜用聯賽級別衡量兩隊實力差距，奧連特越級挑戰會主守，有力頂到90分鐘，受讓一球要下盤。

另外，亞冠盃廣州恒大（足智彩譯：FC廣州）首回合輸一球，返到主場贏兩粒係最低目標，呢支富豪球隊人腳屬亞洲一線，讓得起西悉尼流浪者球半。