畢爾包土霸王玩死里

猪拉多纳

西甲水準高，即使畢爾包呢種被視為二線球隊，出戰歐聯一樣踢得有板有眼，佢哋喺附加賽首回合作客打和意甲拿玻里1比1，晉級形勢佔上風，今晚次回合返回主場，更加可以發揮巴斯克地區「土霸王威力」，畢爾包小讓拿玻里平半，度士睇好開出上盤。

（有線64、203台周四凌晨2時45分直播）

講星味，畢爾包肯定比唔上皇馬、巴塞，甚至連拿玻里都不如，但會方傳統上重用土炮，令球隊建立非常強嘅凝聚力，尤其係主場比賽，巴斯克地區主義濃厚，球員更加落力。畢爾包上季聯賽主場成績出色，包括擊敗巴塞，正係佢哋獲歐聯附加賽資格嘅主因。今仗係畢爾包今季第一場主場賽事，勢必力爭打響頭炮。
拿玻里缺態難搞

拿玻里首回合主場都佔唔到優勢，攻門次數比對手少，可以逼和算有運。由於希古恩等世盃腳比較遲歸隊，影響球隊季前備戰，同埋意甲仲未開鑼，球員狀態仍然不足，情況實在唔樂觀。由於拿玻里今仗最低限度要入波先至有價講，壓前搶攻嘅時候，如果球員唔夠態，導致回防唔夠快，隨時被畢爾包反咬一口。