恒大出音波功反擊流浪者

猪拉多纳

亞冠盃八強次回合賽事，廣州恒大淘寶（足智彩譯FC廣州）回師主場迎戰西悉尼流浪者。恒大首回合落後0比1，今仗主場出擊勢必要贏對手兩球或以上才能晉級，球隊雖有三名球員及主帥納比坐波監，但前線攻擊組合基拿甸奴、艾傑臣及迪亞文迪級數甚高，配合主場球迷嘅吶喊助威，有力絕地反擊，阿謙睇好佢哋可以輕取流浪者，讓球主勝值得支持。

（now 670周三晚8時直播）

恒大首回合作客輸0比1，更麻煩嘅係前鋒郜林、後衞張琳芃及中堅金英權今仗都要坐波監，就連主帥納比同樣被罰停賽無法喺場邊督師。不過，新加盟恒大嘅前意大利國腳基拿甸奴上仗已有上陣，佢同同鄉中場迪亞文迪及巴西射手艾傑臣經過首回合嘅磨合，相信今仗可以發揮最強威力。而且恒大球迷一向熱情，佢哋嘅吶喊助威絕對能推動球員踢得更進取，今仗有力輕取對手晉級。

西悉尼流浪者首回合贏波令人有點意外，尤其球隊剛喺澳足盃出局，但該仗表現其實唔算突出，只憑射手杜米祖歷把握機會攻入致勝球。事實上，西悉尼流浪者今夏有中場小野伸二、普蘭斯、阿倫穆爾及靴斯離隊，呢幾名球員之前係球隊取得好成績嘅功臣，尤其靴斯嘅轉會更令球隊右路側擊威脅力大減，今仗作客將更難踢。阿謙睇好恒大起碼贏到西悉尼流浪者兩球或以上，1.97倍讓球主勝咪錯過。
南韓打吡捧首爾

另一場8強次回合上演「南韓打吡」，由FC首爾主場鬥浦項制鐵，首回合兩隊互交白卷。FC首爾日前聯賽收起多名外援，明顯為今仗留力。浦項制鐵仍堅持重用本土球員，但有射手曹贊浩及後衞金大浩未傷愈，加上球隊近三仗未贏過，平手盤當然捧主隊。

（now 671周三晚6時30分直播）