畢爾包上盤手到「拿」來

猪拉多纳

主場對意大利波未輸過

畢爾包今晚返番主場，同意甲勁旅拿玻里上演歐聯附加賽次回合，雖然「巴斯克軍團」首回合被逼和，但佢哋喺主場對意大利球隊未輸過，絕對係信心保證。「畢包」今場讓平半，一於撐1.8倍上盤，睇住佢哋贏波晉級！

(有線64、203周四凌晨2:45直播)
拿玻里新兵迪根斯文未踢得

畢爾包雖然喺西甲開鑼戰0:1輸畀馬拉加，新球季一出閘唔多順，但其實佢哋輸在球證玩嘢，亂吹入波無效搞到食詐胡輸波，論表現其實算唔錯。畢爾包今晚雖然有射手安歷基蘇拿因傷繼續缺陣，但其他球員冇病冇痛人腳幾整齊，況且佢哋喺歐洲賽主場對意大利球隊6場都未輸過，畢爾包絕對有主場優勢。

對手拿玻里最近簽入西甲維拉利爾中場約拿芬迪根斯文，但今場仲未可以上陣，所以要繼續靠借將加根奴擔任防中。佢哋喺首回合靠希古恩入波先逼和畢爾包，今場去到人地地頭未必可以咁好彩，都係疊埋心水等意甲開鑼啦！