主場圈分組今晚抽籤

猪拉多纳

些路迪出局 波圖晉級

正所謂過到初一都過唔到十五，上圈因對手歷基亞違規起用停賽球員而僥倖晉級嘅些路迪，昨日凌晨喺歐聯附加賽次回合主場迎戰斯洛文尼亞球隊馬里博爾，被斯軍前鋒馬高斯泰華利斯混戰中建功，最終以0比1落敗，兩回合計輸1比2，呢支蘇超班霸始終難逃出局厄運，只能降呢踢歐霸。

至於葡超勁旅波圖則喺主場輕取里爾兩粒，兩回合計贏3比0。同馬里博爾、尼科西亞、巴迪、辛尼特齊齊進身分組賽，加埋今日凌晨晉級嘅5隊，以及包括上屆盟主皇馬在內嘅22支自動出線隊伍，將於今晚進行主賽圈抽籤，並會喺拜仁雙星洛賓、紐亞及皇馬王牌C朗3人中，選出2013至2014年度歐洲足協最佳球員。

（有線61及201台周四晚11時45分直播）