俄超孖寶分途逆轉

猪拉多纳

歐霸附加賽首回合齊吃悶棍

今晚歐霸盃俄超球會四路興兵，Anton最睇好卡斯洛達同莫斯科戴拿模；兩軍首回合成績都未如理想，但佢哋絕對有能力可以喺今仗扭轉逆境，取得歐霸盃分組賽參賽資格。

先講卡斯洛達主場對西甲皇家蘇斯達（周五凌晨零時開賽），對於只有六個球季歷史嘅「BB球會」卡斯洛達，今季首次參加歐洲賽事，每場比賽都係球會歷史，佢哋首回合作客西班牙輸咗0比1，比賽過程亦較被動，不過亦畀到對手唔少威脅，更有一個合法入球被枉判詐胡，賽後球會會長加列斯基同傳媒講，話嗰場波係卡斯洛達今季踢得最好一仗，有信心可以喺次回合反敗為勝。
卡斯洛達決心堅

卡斯洛達今晚喺佢哋嘅古賓球場迎敵，全場逾三萬門票經已沽清，除咗球會會長，賽前多名球員接受訪問，都堅信今場可以贏蘇斯達兩球出線。卡斯洛達係Anton今季十分睇好嘅俄超球隊，經過五場聯賽後，佢哋保持不敗更只失一球，球隊組織能力甚強；相反蘇斯達近況麻麻，聯賽開咧首仗即輸畀西甲新丁伊巴，今仗作客俄羅斯更難睇好。卡斯洛達小讓平半，我捧上盤。

至於另一俄超球隊莫斯科戴拿模，將會喺同樣時間作客塞浦路斯美奧摩尼亞，莫斯科戴拿模首回合同樣失利，主場只能同奧摩尼亞踢成2比2平手，但Anton堅信兩軍實力相差甚遠，戴拿模已經好多年未試過喺歐戰攞到好成績，今次抽到靚籤特別肉緊，教練查治索夫首回合擺大頭搶攻，可惜用三後衞陣式令球隊防守不穩問題進一步暴露，早失波兼兩度落後之餘，仲有射手高哥連被逐離場，最終未能喺主場先拔頭籌。
戴拿模技高一籌

奧摩尼亞係一支組織力強同擅打反擊嘅球隊，性格鮮明，不過平心而論佢哋質素有限，首回合能夠攞到好成績，全因戴拿模頭頭碰着黑，樣樣做錯晒；Anton確信戴拿模可以喺逆境闖關，甚至唔只贏一球，客Ｗ同讓球客勝都有得諗。
Anton 推介：

卡斯洛達 上盤

4★

莫斯科戴拿模 讓球勝

3★

洛格倫 讓球勝

3★