史浩克傷兵成籮 拜仁W咪嫌熱

猪拉多纳

德甲班霸拜仁喺上星期開鑼戰表現一般，好在都贏波攞晒3分，今晚作客上季季軍史浩克，本來應該係個考驗嚟嘅，之不過史浩克家陣傷兵滿營，最新消息係連中場核心奇雲保定都喺賽前練習賴嘢，相反拜仁就趁轉會市場臨閂門前密密掃貨，為保正選，一班球員自然要加把勁，今場1.38倍客W咪嫌熱。

（有線61、64、201及203周日凌晨0:30直播）
簽埋沙比仔正選競爭大

拜仁高價簽入中堅貝拿迪亞後，教練哥迪奧拿再簽埋西班牙同鄉沙比阿朗素，令原本已經係鑽石級嘅陣容更加光芒四射。依家就算係將班球員分開正選同後備兩隊，要喺德甲名列前茅都夠數。球隊陣容雄厚，班兵一定認認真真先至得到教練信任，博個正選返嚟。喺良性競爭下，一有機會落到場自然就會交足100%貨。

雖然羅拔利雲度夫斯基同洛賓日前因傷缺練，唔知會唔會影響出場機會，但消息話列貝利同上仗受傷嘅馬里奧葛斯都可以復出，拜仁嘅戰鬥力依然好有保證。尤其是一班遲咗歸隊嘅德國世盃國腳再練番波多一星期後，狀態應該會有所提升，有助今場表現。
哥拉辛拿斯斷韌帶保定練習受傷

史浩克喺德盃出局後，上星期聯賽一開鑼就輸畀漢諾威，明顯傷兵問題影響幾大吓！最新仲有因韌帶撕裂要長抖嘅左閘哥拉辛拿斯加入「十字軍營」，同法芬、哥列斯卡、內田篤人同埋門將基爾化齊齊做營友。《圖片報》更指奇雲保定日前操練受傷，今場上陣成疑。以史浩克依家嘅頹勢，就算喺主場都好難頂得住拜仁。
頂占筍盤：拜仁慕尼黑 客勝

盤路解碼

拜仁上季作客勝仗：29場（47%）