斯巴達搶W迎接新竇揭幕

猪拉多纳

俄超今晚展開第6周賽事，莫斯科斯巴達將會連續第6場作客，對手係下游球隊阿馬卡。由於斯巴達個新主場下周五揭幕，為咗迎接呢項盛事，佢哋冇可能放軟手腳，1.67倍客勝唔博點得！

斯巴達為咗遷就主場落成進度，今季季初一口氣要踢6場作客波，簡直做咗俄超嘅無家者代表隊，今場係作客之旅最後一站，佢哋為咗以勝利做終結，同埋慶祝新竇口啟用，呢兩日特別响人造草場練波兼踢熱身賽，擺明就係要適應阿馬卡個膠場，希望整番場漂亮嘅勝仗。

對家阿馬卡開季只和過莫斯科魚雷，其餘全部輸晒，仲要開咧5戰只入1球，完全係俄甲水準，試問又點頂住俄超傳統勁旅斯巴達吖！