疲「兵」難捉狐狸

猪拉多纳

唔經唔覺，英超打到第三輪，睇番之前兩輪都係下盤當道，特別係今季決心重振雄風嘅曼聯，話晒都係名牌球隊，長期受到散戶追捧，難免被大圍唱到熱晒，結果三場不勝兼全部輸盤，最慘係一眾散戶見紅魔落後嗰陣，係咁買佢哋追和或反勝，最終輸到一殼眼淚，相反大戶見勢色唔對，選擇按兵不動，果然精明。

另一支勁旅「兵工廠」阿仙奴亦唔好得幾多，連埋盃賽佢哋打咗四場，雖然未嘗一敗，但讓得太辣完全唔益上盤客，況且呢班波睇錢大過天，啱啱喺「金礦」歐聯搏得好盡驚險過關，條氣都未抖順，話咁快今晚返聯賽就要作客「狐狸」李斯特城，仲要讓到半一，純粹因為「狐狸」係升班球隊，但讓到咁多實在過晒火位，呢個下盤有買趁早。