拉魯斯主場夠殺奧林普

猪拉多纳

阿甲球隊拉魯斯開季表現雖然好一般，但球隊喺自己地頭仍能保持一定戰鬥力，今仗面對近期表現有啲回落嘅奧林普，阿King睇好佢哋可以喺主場贏波，主W可視作過關變倍器。

（周二凌晨4時開賽）

拉魯斯開季表現唔算好，但兩場敗仗全部都喺客場錄得，主場則持續處於強勢，並延續跨季不敗紀錄，近10次主場聯賽錄得8勝2和佳績，可見球員喺主場作戰可以交到貨。拉魯斯剛戰作客雖輸畀沙士菲，但球隊冇任何傷停問題，今仗主場出擊有望回勝軌。

奧林普上仗面對獨立隊先勝後敗，更有入球功臣中場莊拿芬白蘭高領紅被逐今仗要停賽，對球隊打擊甚大。奧林普上季次階段客場成績平平，只曾擊敗當時陷入低迷嘅基爾梅斯，今仗更缺少開季取得球隊所有入球嘅莊拿芬白蘭高壓陣，作客拉魯斯相信都係凶多吉少，捧主W！
捧班菲特堤格雷

同日另外兩場阿甲，沙蘭迪兵工廠上仗補時失守落敗，球員士氣難免受影響，面對上賽贏波嘅班菲特，縱有主場之利亦未必有十足把握，可捧讓球客勝。堤格雷上賽輸波雖有後衞卡魯圖被逐今場停賽，但對手基爾梅斯有中場艾拿度干沙利斯、白賴仁沙文圖及巴拉拿無法上陣，今仗作客惡唔出樣，捧主隊。