4星德國再o趙阿根廷

猪拉多纳

世盃決賽翻版劇本一樣

今晚喺杜塞爾多夫爆發重量級熱身賽，德國同阿根廷時隔50日之後合演「巴西世盃決賽翻版戰」，唔同嘅係阿根廷會由新帥馬天奴首度領軍，但相信劇本都係一樣！「日耳曼兵團」首度孭住4星牌頭出擊，對住有鎮隊之寶美斯缺陣嘅阿根廷，當然要捧場撐1.73倍主勝。

（無綫翡翠台周四凌晨2:45直播）

德國喺7月中嘅世盃決賽，憑馬里奧葛斯一箭定江山搞掂阿根廷封王，相信呢場波大家都仲記憶猶新。領隊勒夫今鋪徵召嘅23人大軍名單當中，有18人係巴西世盃戰將，論默契肯定一流。大軍日前喺杜塞爾多夫進行公開操練，獲大約4.5萬名球迷入場打氣，班鄉親父老咁捧場，今勻點都要喺自己地頭威多鋪。
4.5萬德迷練波打氣 奧斯爾有傷缺陣

中場奧斯爾有傷在身，總經理比亞荷夫前晚證實「大眼仔」肯定缺陣，但下周一凌晨鬥蘇格蘭場歐國盃外圍賽就可以復出。亨格比利認為冇咗奧斯爾根本唔打緊，皆因「日耳曼兵團」有馬里奧高美斯重返國家隊，兼有馬高列奧斯孭飛，攻擊力一樣咁堅。
阿根廷新帥首演 未摸熟冇美斯點掂

3位世盃奪冠主力包括前隊長拿姆、中堅梅迪薩卡同前鋒高路斯已經退出國家隊，預計謝路美保定同賀維迪斯會頂替前兩人位置，照計對今仗影響唔算太大。畢竟阿根廷出名係一人球隊，齋睇呢支世盃亞軍喺世盃分組賽要靠美斯連環救命先搶到分，就知呢位巴塞「球王」對阿根廷係幾咁重要。既然有美斯都照贏你，今鋪冇埋仲使乜赦你吖！

況且新帥馬天奴上任冇耐，摸熟隊波都要時間啦，前晚先獲補選入伍嘅熱刺中場拉美拿同賓菲加指揮官奧斯華度加坦，亦缺乏國際賽經驗，呢鋪點計都係要德國。
Data King：德國8戰半場不敗

‧雙方近5仗都有4場開入球細。

‧德國近8戰未試過半場落後。

‧阿根廷過去21次鬥德國錄9勝4和8負。
盤路解碼：德國近10場戰果 5勝5和