加納齊心合力除烏氣

猪拉多纳

加納喺今夏世界盃亂過亂世佳人，爆出獎金風波不特止，辱罵領隊嘅奇雲保定同推撞足總人員嘅蒙達利，亦雙雙被踢出大軍，最後搞到分組賽墊底出局。但事隔兩個月，如今內亂平息，「黑星」團結一致再踏征途，今晚非洲國家盃外圍賽E組迎戰「私房菜」烏干達，揀1.78倍「讓主」實冇衰。

（開賽時間：周日凌晨0:00）

加納國腳奇雲保定同蒙達利雖被內部禁賽，實情中場依然猛將如雲，除咗有「加納美斯」之稱嘅基斯甸艾素，加上卡華禾艾沙姆、阿休同艾爾文巴度幾名歐洲搵食球員，放諸非洲已經夠晒照。最重要係班國腳經一事長一智，年輕射手華維斯直言經過世盃慘痛一課後已經吸取教訓，覺得對國民有所虧欠，希望以成績彌補過錯。
對賽贏成條街

加納隊長基恩更加身先士卒，雖然「黑星」過往6次主場鬥烏干達拎到5勝1和，成績一面倒佔優，但佢完全冇睇低對手，賽前講明同隊友會傾盡全力贏波：「雖然往績秤先，但今場絕對唔會輕敵，必須踢場好波為國民帶來歡樂。」加納現時上下一心，當地傳媒仲用「贏番球迷嘅愛之戰」嚟形容今場波，相信班國腳落到場自然搏盡冇留手。
烏干達唔齊腳

另邊廂，烏干達本來級數已經同加納冇得揮，最弊係佢哋陣容唔齊腳，除咗箭頭艾曼紐奧基同左翼馬捷維加兩大主將缺陣，另一進攻命脈謝菲馬沙亦由於効力球會比勒陀利亞大學唔放人，搞到佢冇得為國效命，今場被迫起用喺非國盃從未入過波嘅烏文尼掛帥，變相令加納可以冇後顧之憂狂攻，「黑星」贏兩球濕濕碎啦！