法國狙擊塞爾維亞

猪拉多纳

今晚除咗歐國盃外圍賽賽事之外，法國會作客同塞爾維亞踢場熱身賽。「高盧雄雞」啱啱成功洗刷8年不勝西班牙紀錄，以1:0打倒對手，依家一眾法兵士氣高昂準備再下一城，不妨追多鋪直取1.88倍客勝。

（有線64及203周一凌晨2:45直播）
世盃班底默契贏晒

法國貴為2016年歐國盃主辦國，所以唔使踢外圍賽，不過佢哋都冇偷懶趁住國際賽空檔不停約對手拍跳。佢哋上仗以1球小勝西班牙，雖然話「鬥牛兵團」今非昔比，但睇到領隊迪甘斯賽後興奮大叫：「我哋已經8年未試過贏西班牙喇！」就知贏波對班波信心幫助有幾大。

「高盧雄雞」今次點兵以世盃班底為主，戰鬥力、默契唔使懷疑。就算射手賓施馬冇波入，都仲有上仗後備建功嘅前鋒雷米幫手，鋒力有保證。而且法國上場亦逼到西班牙全場埋門冇腳中龍，以馬馬度沙高為首嘅防線亦值得信賴，對住換帥冇耐嘅塞爾維亞實佔甜頭。
塞軍易帥適應需時

塞爾維亞喺7月委任新帥艾禾卡特領軍，除咗鐵衞蘇保迪缺陣外，翼鋒拿沙馬高域、守將伊雲洛域等人悉數入選。雖然艾禾卡特賽前話會繼續排出塞軍用開嘅4-3-3陣式，但今次始終都係將帥雙方首次合作，演出難有保證。最重要係塞軍3次同法國交手取得1和2負不勝戰績，今晚再被法國剋住唔出奇。