三獅BB搞唔掂瑞士

猪拉多纳

中秋佳節 朗尼倍思「雙特」

今日係中秋節，阿占先祝大家人月兩團圓！「三獅兵團」今晚喺歐國盃外圍賽踏出重建第1步，不過呢一步似乎「舉步維艱」喇，事關英格蘭喺E組首戰就要造訪出線大熱門瑞士，冇咗林柏特同謝拉特嘅「三獅BB」，連少少創造力都冇，憑咩砌低世盃16強分子瑞士？平手盤捧1.78倍瑞士，坐和望贏！（有線61及201周二凌晨2:45直播）

英格蘭喺世盃一場不勝包艇出局，領隊鶴臣嘅領軍能力備受質疑，但英足總就死攬呢位老帥，話要畀佢玩埋歐國盃先喎。
新丁孭飛改踢法 朗尼冇供應

咁講真，鶴臣依家全面引入新血，其實係別無他法嘅，始終謝拉特、林柏特退出國家隊後，英格蘭中場中路就已經再冇人派牌，焗住啲波要由兩邊去，全新陣容全新打法，朗尼唔能夠同「雙特」「團圓」，完全冇供應，最佳例子當然係上周中熱身賽，英格蘭主場只係靠一球12碼險勝挪威，咁嘅鋒力，點信得過？

冇錯，哥林張伯斯、哥爾碧克同史東斯等新星係可造之才，但佢哋嘅國際賽經驗嚴重不足，就連擔大旗嘅利物浦雙星史杜列治同史達寧，都只係因為上季大爆發先上到位，最弊連史杜列治都話打埋柴，今戰要由韋碧克頂上，個陣殘都算喇，所謂「三獅老大哥」朗尼，其實都仲學緊點做隊長，成隊波仲有好多要改進嘅地方，話贏就贏咩？
瑞士踏入收成期 勁多實力球星

主隊瑞士雖然唔係世界一級勁旅，但佢哋喺國際賽嘅表現相當穩定，近6屆大賽只係缺席過2012歐國盃，近3屆世盃更兩度打入16強，中場梳頓沙基利、恩拿同比哈美都係好有料嘅球星，最重要係呢隊波已經夾咗好多年，依家正步入青訓收成期，英格蘭作客想贏佢哋？冇咁易囉！
歐國外E組：盤路解碼：瑞士近4次讓球盤贏3次！

Data King：瑞士地頭威力勁

‧英格蘭連續6場作客瑞士有波入。

‧「三獅軍團」近6次客戰僅1勝。

‧瑞士連續9仗主場有士哥，有6場保持清白身。