干地改革有料到 意大利攞威冇難度

猪拉多纳

意大利鐵帥干地上月接掌帥印，即實施改革，尤其佢喺用人同排陣方面作出大幅改動，又提振士氣，令意軍充滿一片新景象。上周中佢更打破近16年來「藍衣兵團」新帥首騷不勝嘅魔咒，一洗世盃分組出局嘅頹風，今晚佢哋於歐國盃外圍賽H組首仗，作客對實力不濟兼沉到冇朋友嘅挪威，梗係力爭打響頭炮，簡單啲宜客勝乃不二之選。

（有線64及203台周三凌晨2時45分直播）

今夏喺世盃恥辱地分組賽出局嘅意大利，搵來前祖雲達斯領隊干地接手，上周中即喺熱身賽以2比0輕取世盃季軍荷蘭，令佢成為98年索夫之後，第一位喺首騷贏波嘅「藍衣兵團」新帥，仲勁過查帕東尼、納比、柏蘭迪利等一眾名帥。干地最厲害之處，就係敢於起用新人同試新陣，亦大膽激勵球員鬥志，帶領佢哋由谷底反彈，之前能將祖記由第7變第1，仲要連續3季於聯賽封王，可見佢嘅領軍功力確有一手。
挪威攻守都唔掂

從對荷蘭一役所見，意大利嘅精神面貌大有改善，在中場核心派路及蒙杜利禾因傷落選下，迪羅斯嘅勇悍演出帶動起其他隊友，賽後更獲干地激讚。干地重視紀律，今次特登唔選麻煩友巴洛迪利，起用贏荷蘭一仗表現突出嘅兩名前線新星恩莫比尼及施蒙尼沙薩合作攻堅，上仗已經證明有料到。

相反挪威沉淪多時，自從2000年歐國盃之後未入過大賽決賽周，現已淪為歐洲三線球隊，同組對手有保加利亞、克羅地亞、阿塞拜疆同馬爾他，想突圍唔容易。號稱潛質唔曳嘅祖舒亞京治、穆罕默艾爾尤諾斯、史提芬祖漢臣等新仔，仲未證明夠料喺一隊立足，加上前線欠缺一把銳利嘅尖刀，難怪之前6仗入得3粒咁少，連水晶宮中堅軒治蘭特都冇入選，真係攻守都唔掂。就算意大利有派路、基亞連尼及馬治斯奧等因傷停倦勤都冇有怕，不妨直取客勝。