巴西入波唔慌多

猪拉多纳

尼馬未必出 羅賓奴生銹

巴西繼續喺美國踢熱身賽，今次對厄瓜多爾，「森巴兵團」即使改由鄧加執教，但仍然擺脫唔到「尼馬依賴症」，今次大軍鋒線人腳甚至比世盃陣容更不濟，進攻欠亮點，期待傳統華麗踢法嘅森巴擁躉難免感失望。鄧加重掌帥印旗開得勝，應會沿用「悶住贏」嘅思維。「高原球隊」厄瓜多爾離開自己地頭，難有作為，最好揀入球細。

（周三早上9時開賽）

鄧加球員時代司職防中，成為領隊後亦講求穩陣，佢06至10年首度執教巴西，已經被批評戰術沉悶。今次回巢依然故我，只係召入三位前鋒，除咗尼馬，仲有沉淪多時嘅羅賓奴，以及名不經傳嘅明尼路射手迪亞高泰達利。講到尾都係靠尼馬一人食胡，上仗熱身賽就係憑佢喺補時比賽末段射入罰球，1比0險勝哥倫比亞。

由於尼馬剛傷愈冇幾耐，估計鄧加今場可能畀佢休息，以及作出其他輪換，更加難奢望巴西會多波入。另外，上仗踢足全場嘅右閘馬爾干因為私自通宵夜蒲，被領隊鄧加踢走，已補選摩納哥小將法賓奴泰華利斯。
厄瓜多爾冇主場難偷雞

厄瓜多爾今次並冇徵召曼聯中場路爾斯華倫西亞，陣中較有名氣只係今季加盟韋斯咸嘅前鋒安拿華倫西亞，面對實力高一班嘅巴西，恐怕佢好難有發揮空間。同埋厄瓜多爾出名靠「高原主場」搵食，今仗去美國比賽無力偷雞。預料巴西可小勝，主W乏味，揀細盤為妙。