荷蘭防線穿窿 捷克至叻食橙抵捧

猪拉多纳

今晚歐國盃外圍賽A組首輪賽事，捷克坐鎮布拉格迎戰荷蘭。「橙衣軍團」新帥希丁克重掌帥印後，日前首度領軍落筆打三更輸波，防線浮現唔少問題，今場造訪同組最惡啃嘅捷克，贏波唔容易，捷克主場受讓揀1.93倍「讓主」。

（有線61、201周三凌晨2:45直播）
捷克歐國盃醒神 4次交手未輸過

荷蘭日前熱身賽淨吞意大利兩蛋，開波冇耐極速落後，跟住馬田斯恩迪再喺禁區食個「紅牌+12碼」套餐，搞到場波一早放咗入雪櫃，主帥希丁克賽後都以「幼稚」形容後防表現。今場作客捷克，荷蘭缺少洛賓、亨特拉爾兩名進攻好手，前線需由古積特同迪比夥拍尹佩斯搵食，級數明顯低咗個層次，要希帥忙住堵塞防線漏洞，又要諗計攻破捷克大門？難啲噃！

捷克今屆世盃雖然冇份，但佢哋踢歐國盃就特別醒神，自捷克斯洛伐克分裂後，連續5屆歐國盃成功殺入決賽周不特止，96年同04年歐國盃外圍賽就算撞正荷蘭都冇有怕，4戰2勝2和未輸過，其中主場兩戰更加贏晒。今場有路斯基喺中場指揮同施治把守最後一關，睇好至少有分落袋，受讓梗係撐啦！