地頭龍哥連泰斯上盤好「路」

猪拉多纳

聽日選擇唔算多，得番南球盃同巴甲充撐場面，大家不妨儲定啲彈藥，留番周末重開嘅主流聯賽先至出手。若然真係等唔切，不妨留意今季主場表現穩定嘅哥連泰斯，聽朝迎戰傷兵滿營嘅明尼路，讓平半要1.67倍上盤。

（開賽時間：周五早上6:30）
明尼路傷兵滿營

儘管哥連泰斯有表現回落迹象，近5戰只贏得1場，但呢班波一返到主場比賽就唔同講法。佢哋喺自己地頭已經連續10場不敗，一對鋒將荷西古里路、盧斯安奴尼維斯喺主場出戰聯賽又零舍醒神，近5戰各自轟入3球，咪忘記哥連泰斯仲係巴甲防守王，攻守兼備邊輪到明尼路作惡！

另邊廂嘅明尼路發揮有改善，之但係班波傷兵問題愈嚟愈嚴重，除咗本身已有前鋒馬高素爾、後衞柏度保迪奴兩件打柴外，依家就連主力中場達托羅、守將利華漢拔圖等6名球員都加入十字軍，首席射手迪亞高泰達利又要為國効力，被巴西徵召去美國踢熱身賽返唔切嚟幫手，呢鋪仲點撐得落手先？