拜仁中場大執位「-2」博「和」

猪拉多纳

（六）19 拜仁慕尼黑 Vs 史特加

德甲班霸拜仁慕尼黑開季後狀態一般，今晚聯賽主場迎戰史特加，咁啱又受到傷兵問題困擾，尤其防守人腳方面就更加唔夠人用，加埋下周中歐聯分組賽重開有後顧之憂，相信今場就算贏波，都唔會係大開殺戒嗰種，拜仁「-2」博4.1倍「讓球和」。

（有線61及201周六晚9:30直播）

雖然拜仁陣中粒粒皆星，分開兩條戰線都仲得，但黑起上嚟就真係無得傾，正當梳頓沙基利埋怨冇上陣機會嘅時候，班波防線就五勞七傷唔夠人用。原本已經有堤亞高艾簡達拿、查維馬天尼斯同舒韋恩史迪加養緊傷，點知連新加盟嘅沙比阿朗素日前都傷埋，睇怕今戰又要搵拿姆繼續頂住防中先喇！
史特加今季未贏過

拜仁喺歐聯同曼城同組，咁啱下周四凌晨踢嘅第一場分組賽對手就正正係呢支英超冠軍。以哥迪奧拿咁擅長計數，相信今場德甲務求贏少少，攞咗嗰3分上手就算，留番啲力應付歐聯。事實上，拜仁喺安聯出擊好少甩拖，呢場要贏應該冇乜難度。

作客嘅史特加上季係護級分子，實力低主隊幾班，今季頭3場聯賽只得1和2負未試過贏波，今場去到安聯球場，就算輸兩球都要講番句多謝啦！

Yennie
頂占筍盤：拜仁慕尼黑 讓球和