對賽旺客隊 寧捧西布朗

猪拉多纳

近三仗未贏過嘅熱刺，今晚將回師主場迎戰今季未贏過嘅西布朗。熱刺近況麻麻，今仗續有數名球員因傷缺陣，加上近8次同西布朗嘅對賽，主場嘅一方只係贏過一次咁大把，呢個對戰組合似乎對主隊唔多有利，阿謙今仗都係支持受讓嘅西布朗，捧讓球客勝。

（now 622周日晚8時30分直播）
熱刺近3仗未贏過

熱刺喺上周中歐霸盃分組賽作客柏迪遜踢成0比0，球隊已經連續3場賽事贏唔到，狀態其實麻麻。熱刺上仗歐霸盃未有派出艾迪巴約、查迪尼及卡保奧等主力上陣，相信呢班球員今仗對西布朗有望復出，但球隊仍有基爾獲加、維頓漢及蘇爾達杜等傷兵，今仗難言穩勝對手。

西布朗上仗聯賽主場以0比2不敵愛華頓，今季聯賽仲未贏過波，但前鋒比拉希奴希望球迷唔好咁快幫球隊下判斷，應該畀更多時間佢哋證明實力，球隊目前有安尼捷比及穆林保兩位傷兵。其實，熱刺同西布朗呢個對賽組合似乎對主隊唔係太有利，兩軍對上8次交手主隊只係贏過1場，上季熱刺主場只係能夠同西布朗踢成1比1，以熱刺現時嘅狀態今仗難望穩贏對手，一於捧受讓嘅西布朗。