狼堡利華鬥攻合演入球Show

猪拉多纳

今晚德甲有場精彩大戰，由禾夫斯堡主場迎戰火力強勁嘅利華古遜，「狼堡」踢咗3場聯賽雖則未贏過，不過呢班波進攻火力一向唔曳，就算今場對住「一哥」利華，「阿占」相信會照踢進攻足球，1.5倍入球大咪嫌熱！

（有線61、64、201及203周日晚9:30直播）
孫興民狀態大勇

「狼堡」頭3場聯賽2和1負，但都照樣Keep住有波入，只係防線麻麻搞到失分，呢隊上季入咗63球嘅球隊向來踢法進取，除咗老將奧歷仲有貨交之外，中場奇雲迪布尼後上入球能力都係一絕，仲有列卡度洛迪古斯上周中歐霸射入球世界波破蛋！就連新加盟嘅賓特拿都話目標係效法迪斯高，喺德甲一季入28球喎，做唔做到無人知，但至少有呢份鬥心吖！

利華今季有前冇後嘅踢法好食兼好睇，頭3場聯賽一共入咗9球波咁多，當中南韓前鋒孫興民狀態大勇好有威脅，上輪同不來梅激戰踢成3:3，真係睇到球迷拍爛手掌，既然利華嘅喪攻打法暫時有唔錯成效，相信今場都無咩必要改變，球迷可以等睇入球騷。