悉尼打吡大畀你睇

猪拉多纳

今晚雖然有好多場賽事舉行，但阿King睇中咗場澳洲足總盃賽事，悉尼市將會上演打吡戰，由悉尼聯主場迎戰FC悉尼。悉尼聯喺主場一向踢法進取，近4仗每場最少攻入對手兩球，而FC悉尼近期狀態亦相當唔錯，今仗打吡戰雙方都會搏盡，入波應該唔會少，阿King捧大盤。

（有線64及203台周二下午5時30分直播）

澳洲足總盃嚟到16強，最受注目嘅賽事就係「悉尼打吡」，由踢緊澳超新南威爾斯賽區嘅半職業球隊悉尼聯，主場對澳職嘅FC悉尼。呢場波自上月公布賽程後已備受當地注目，尤其係悉尼聯主席Mark Ivancic表明係球隊近15年來最重要嘅賽事。事實上，悉尼聯近期喺主場嘅表現亦相當唔錯，近4仗錄得3勝1和佳績，而且每場波最少攻入對手2球，可見火力甚猛，今仗相信都會踢得較進取。
獅吼往績食住阿聯

FC悉尼上圈加時先淘汰墨爾本城，球隊之後踢咗5場波，錄得4勝1和佳績，佢哋今夏獲得奧地利國腳前鋒真高加盟，呢位射手曾喺奧甲同荷甲都取得雙位數入球數字，轉戰澳職相信有力取得唔少入球。「悉尼打吡」對雙方而言屬面子戰，所以兩軍一定全力以赴爭取勝利，阿King估計今仗入波唔會少，捧大盤。

另一場澳洲足總盃賽事，布里斯班獅吼近六次作客阿德萊德聯竟錄得5勝1和嘅成績，明顯食住對手，今仗更有澳洲中場沙路達再由荷甲烏德勒支外借加盟，相信有望延續呢項佳績，捧上盤。至於英錦賽方面，英乙球隊紐波特郡雖喺主場出擊，但近期表現只屬一般，今次要鬥甲組史雲頓難以樂觀；史雲頓近期攻力不俗，可挾日前大勝之勢贏波晉級。